El programa incluye una esposición, teatru y actividaes infantiles pa reivindicar la importancia del asturianu y l’eonaviegu

18/02/2023.- El Gobiernu d’Asturies va conmemorar la selmana qu’entra la celebración del Día de la Llingua Materna (21 de febreru) con un programa d’actividaes que va desenvolver en Grandas de Salime, Piloña, Noreña y Cangas del Narcea. La Conseyería de Cultura, Política Llingüística y Turismu, al traviés de la Dirección Xeneral de Política Llingüística, impulsa actividaes d’artes plástiques, teatru y talleres empobinaos al públicu infantil cola mira de reivindicar la importancia y la riqueza que l’asturianu y l’eonaviegu representen dientro de la cultura asturiana. Toles actividaes van ser gratuites pal públicu interesao.

El llunes que vien la Casa de Cultura de L’Infiestu va acoyer a partir de les 17:00 hores Mazcaraes d’iviernu, a cargu d’Aladanza Educación y Tradición. Una actividá que celebra la llegada de los díes de más lluz y onde, aprovechando l’antroxu, los más pequeños van poder preparar una mázcara del personaxe protagonista de les mazcaraes tradicionales que quieran más. Yá’l martes la Casa de Cultura de Noreña va ser l’escenariu de la representación de Les aventures del cuélebre tragón, teatru de marionetes a  cargu d’Elisabet Martín Teatro. La función va empezar a les 18:00 hores. 

L’espectáculu Quixote, de Carlos Alba, va llegar el miércoles 22 a les tables del Teatru Toreno de Cangas del Narcea. Amás, el públicu va poder disfrutar hasta’l 14 d’abril nel Muséu Etnográficu de Grandas de Salime de la esposición Nosoutras ideamos arte, una muestra que propón un percorríu pelos saberes, xeres y conocimientos de les muyeres del mundu rural al traviés de testimonios gráficos apurríos poles sos protagonistes. El proyectu busca poner en valor el gallego-asturianu o eonaviegu como llingua materna a reivindicar y promocionar coles otres tradiciones y saberes populares.

El programa del Día de la Llingua Materna complétase cola puesta a disposición pola Conseyería de Educación d’una ferramienta interactiva Genially pa toles etapes educatives con actividaes didáctiques n’asturianu y n’eonaviegu, Recursos pal aula / Recursos pral aula.